französischi alpe 2014
eis vorweg
ds regewetter hei mir o id ferie gschiggt.
d planig isch wiedermou chli schleppend gange, obwou d idee u d richtig scho lang i mim chopf si gsi.
so si mir de wie immer em schöne wetter noche gfahre. da da diesmou mit minere idee, di französische alpe ga zluege, überi gstumme het, isch em weg richtig süde nix meh im weg gstande.
so hei mir zerscht es paar kilometer autobahn gmacht um de im wallis übere grossi sankt bernhard d schwiz zverloh.
di nächschte kilometer dur italie u übr e chlini sankt bernhard uf frankriich.
am sunnti morge isches doch no recht frisch gsi, wo mir am nüni uf e töff gstiege si. das mir de am zeni scho uf em col d’iseran e fotihaut iigleit hei, isch em troumhafte wetter, z vedanke gsi. dr chaute u heftigi wing het de d pouse chli verchürzt.
jetz es paar hundert höhemeter durab richtig lancebourg, wo ig eigentli gern mi tank gfüllt het. nu, ke tanksteu wit u breit. ok, de haut mit em rescht übr e mont cenis richtig susa.
am lac de mont cenis het mi gwunger wege dr zuefahrt zum mont malamot de gsiegt u mir si ga ds fahrverbot sueche.
bekanntlich hets ja eis, weu ds fort ime naturpark steit. gseh hend mir abr kes. vielicht eifach drum, well ig zweni wit ufe gfahre bi. ok, es isch sunnti gsi u es het zviu wandervögu gha, wo d töffe nid gern gseh uf so schotterstrasse.
auso umchehre, abe uf susa, benzin hole u d wiiterfahrt bespreche.
bime kaffi hani de mi gring duregsetz. zieu, colle de finestre. komischi tafele, fahrverbot, kes verbot, glich eis, de wiedr nu im juli u august, hend’s ois nid liecht gmacht. so hei mir beschlosse, mir choi ke italienisch, chömme nüm drus, auso fahre!!
noch de 26te serpentine hei mir de afe e biker gseh. dr landwirt 2/3 obe het ois de ziemli schräg nachegluegt. wo de endli mou angeri töffe entgege cho si, hei mir ois nüm so im uurecht gfüut.
colle: puah. die uusicht. wetter? na? nüm ganz so blau. es muess jetz eifach troche bliibe. i wet ja übr d assietta!
kaffihaut?
nei, fahre! u los gahts. immer schön richtig weschte. chli ufe, chli abe, chli schotter, chli gueti fahrbahn.
mou chli d‘bei vertrete, fötele, wieterfahre.
eigentli gar nid schlimm bis jetz. u plötzli staht e jeep ir strass. er staht vor enere riesige schlammpartie u traut sich nid dure. er winkt, ig söu cho. ( er het nu wele gugge, wie tüüf die löcher si u ob er stecke bliibe würd 🙁 )
so hani mi de entschlosse, e versuech z mache. d füess am bode, shit, wie schmierseife. chli gas geh, bremse, ds vorderrad abe ids loch. ups, zwar gspüreni feschte grund, abr de isch min 60cm im schlamm. doch jetz chani nüm zrugg. im wüsse, es heti heufer hinger u vor mir u dr hoffnig, dr töff nid abzlege: gas geh u dure. d füess wiit ufe, balanciere, hinge ufe u haute. phuuuuu. gschafft fürs erschti. churz nachefrage, wie de d witerfahrt sig. nu no es churzes stuck sig schlimm. ok. janu de haut, immer no besser, wie 17km zrugg u no eis dur da schlammloch. 200m witer isch de vo auem schlamm nix meh z‘gseh gsi ( usser a oisne kombi u am töff ).
übr schotter de abe uf sestriere u wiiter noch briançon.
dert hets de es bequems neschtli geh u bime es feine znachtesse hei mir de die schlammpartie no uusgibig disqutiert. ah ja, d kombi u d töff hei mittelerwile no e wösch becho, dass mir wenigschtens hoteltauglich gsi si.
tag 3: mi nöchscht idee, e noie aalouf über e parpallion. Noch dem mir im letschte herbst mit em outo hei kehrt ( us luuter rücksicht ufd oeuwanne ), wei mir‘s dermou mit em töff probiere. Auso hopp ab richtig süde u churz vor embrun links weg nach crévoux.
es stuck witer obe im waud faht de dr schotter a. u glii si mir dert verbiicho, wos ebe mit em pw fertig isch gsi. Dr wiiteri weg ufe zum tunnel het sich de scho gli aus nid besser erwiese. Dobe vor em tunnel e pouse, es paar biudli u chli hoffnig tanke, dass es im tunnel ke iis u schlamm het. Iis hets zwar kes gha, aber schlamm
Diese si mir ois ja scho baud gwannet. Angeri tunnelsiite, es paar foti, es biz plaudere, warte bis die landrover-tourischte verbi si gsi. Noch lange 8km schotter ( es isch zwüsche inne gsi wie es bachbett ) si mir ganz dunne aacho.
Jetz es biz benzin, es kaffi mit sandwich (oder so ähnlich) u de gmüetlich wiiter richtig col de la bonnette. Cool, e troum, läck die uussicht, geniau J
Ds tau durab, es paar mengs kilometer diruus, de rechts weg mit blick uf es herzigs dörfli wo obe i de feuse chlebt ( roubions). Über wunderschöni hüguzüg zum nächschte kaffihaut in beuil. Im beizli hets de scho es paar biker gha, u bim herehocke isch ois de dialekt doch sehr bekannt vorcho.
Mir hei ois de verabschiedet u si de witer richtig castellane losgfahre. Baud han i de im rückspiegu bekannti töffkombis entdeckt. Es si die 6 berner vo vorane gsi. Diesi hei mächtig gas geh u hei üs la stah. Doch wies haut so isch im lebe, z castellane si aui fasch gliichzitig ufm parkplatz gstange u hei es hotelzimmer gsuecht.
Schlussendli si mir aui zeme im gliiche hotel ungerbracht gsi.
Am nächschte morge si mir de wieder chli frücher losgfahre, dermou richtig norde, dr wetterbricht het rege gmeudet gha.
Ok, es isch troche blibe u mir hei vergebe dr direkte weg gno. So si mir über e coll d’allos uf barcelonette u dr colle de galibier uf annecy.
I dere herzige stadt hei mir vor luuter restaurants fasch nid gwüsst wo ga esse. Es het de doch es feins esse geh u s bett isch o meh wie nu recht gsi.